Google şirkətinin Pwn2Own haker yarışmasının iştirakçılarına yeni sürprizi
İnternet nəhəngi Google gələn həftə Kanadanın Vankuver şəhərində keçiriləcək Pwn2Own haker yarışması çərçivəsində şirkətə məxsus Chrome brauzerin sındıran mütəxəssislərə milyon dollar mükafat təqdim edəcəyini bəyan edib.
Google yarışın qalibinə 60, ikinci və üçüncü yerləri tutan hakerlərə isə müvafiq olaraq, 40-20 min dollar dəyərində mükafat verəcəyini bildirib.
Xatırladaq ki, ötən il yarışın iştirakçıları Internet Explorer və Safari brauzerlərini “məğlub” edib, qiymətli mükafatlar əldə ediblər. Lakin konkursda iştirak edənlərdən heç kəs Chrome brauzerini sındırmağa cəhd göstərməyib. Hakerlər səbəb kimi brauzerin təhlikəsizlik sisteminin onlar üçün maraqsız olduğunu və “qurdalanmaq” istəmədiklərini bildiriblər.
Qeyd edək ki, 2011-ci ildə yarışın təşkilatçısı Tipping Point şirkəti Chrome brauzerini sındıran hakerə 15 min dollar, Google isə qalibə əlavə olaraq, 20 min dollar mükafat təyin etmişdi.
